البابور

أحمد يبكى وجده’ بيسأل البابور والحاصل بيهو
البابور الجابو’ جدودك شن ختيت يا أحمد فيهو
البابور الكانوا بعانخى وناس ترهاقا أساسآ ليهو
وناس المهدى وود حبوبه الكبو’ دماهم فى تنكيهو
ودورو أزهرى يوم ميلادك وكل الدنيا بتشهد ليهو
شــن ختيت يا أحمد فيهو..؟
ده البابور المن ماقمنا نحكى تملى نفاخر بيهو
وكم إيدين يا أحمد طارت لما الشر مداها عليهو
وتحكى رؤوس جاثاها سيوفنا وتلعن يوما الطمعا فيهو
لا سبناهو ولا بعناهو ولا فى هزار ساومنا عليهو
شــن ختيت يا أحمد فيهو..؟
أوع تسيبه’ يضيع يا أحمد وحاذر أوعا تفرط فيهو
ومهما يطلب منك أدى وكل التقدره’ ليه’ سويهو
يطلب دمك .. كب وازقيهو
يطلب عرقك .. قطره’ ليهو
يطلب لحمك..أقطع لحمك والتق فيهو
هو الرباك وربا جدودك شمر ساقك رد كفيهو
ومن عند ساسك لا فوق راسك شارب خيره’ الماك شاريهو
وحازر يااحمد.. حازر أوع تفرط فيهو