اشعر شعرا السودان

ايمن الأحد مايو 15, 2011 6:06 pm

قصائدمن روائع الشاعر محمد الحسن سالم حميد
------------------------------------------------------------------------------
الضو وجهجهة التساب/حميد

ودَّاها فوق قُوز الرماد
كان ظنُّو يوم يومين تلاتِة
المُوية تنزِل والبحرْ يشرد شُراد
يفضل تَرا
يبراهُو بالسلُّوكة من ورا
والعِيوش والخير يعم يرقد رقاد
والناس تخُمْ خمّ السرور ،
وماهُو البرا
ناساً كُتار فاكرين كدِي
يومين تلاتِة ، الحالة ترجع حالَتَا
ويبنوا البيوت هُو وشفَّعوا وأم الوِلاد
ينجمَّعوا ، ويسترجعوا الماضي
وشتاتات السواد في صالَتَا
شِيتاً ضحك شيتاً بِكِي
ويبقى الخراب دا رهاب رِهابْ
عِبرة وحكاوى بتنحكي
بلدك مِتلْ كمِّين بلادْ
بدت الدقون فيها الخَتَا
نجَّس تراها المُتْرَفين
كِترتْ مواعين الفسادْ
وكان كلمة الإسلام غُتـَا
جاتْ الَلَتْ الله وشالتا
كان ظنُّو يوم يومين تلاتِة
مشى السِبُوع والتاني جا
والمُوية كلما ليك تزيد ويقلْ رجا
قوز الرمادْ الكان قِريْب فات بعيد بقى ماب تخُوجْ
قوز الرمادْ يا الضوْ فِضِلْ جزيرِة ضاربْ فيها مُوجْ
وحصار حصارْ كيف النَجَا
عاينْ البلد دي دمار دمار
فيها إيش فِضِلْ
لعبة قصب فِ إيدين طفلْ
الحِيطة وكتينا الـتقـع
تقع ألفِ وجعة على الضُلعْ
دخانه يمرق في السما
آهاتو تنزف في الأرِضْ
بحر الصَبُرْ والاحتمال
بيناتو ينقطَّع تُرعْ
لا يلقى يربُط لا يحِلْ
لا حولة يا الكتب الكراريس
المكَرِّنِة في الشتِلْ
التَخْتَة أقلام الرصاص
كنَب المدارسْ كُور يلُوجْ
باب الفَصِلْ كاسحبو موجْ
لا قوَّة يا ورق الجرائد يا المصاحف
والصحيحات المَجَخْسنة في الذِبلْ
ورافعين دواليبن بعيد طابلين خَوازِيقُن طَبِلْ
لا حولة حال ما بـتِـنـْقَبِلْ
يا مسلمين وين لي تَسابْ عشرة وتَسابْ كم وأربعينْ
دا يمِين خرابْ كمِّين سنة
يا الضوْ مِنُو الفي الكون يصدِّق
كان هِنا ليلة ذِكرْ حلقةْ مديح
دارةْ غُنا هيصة
ورقيصْ القرمصيصْ
سيرة عريسْ وحلاةْ عروسُو محَنْنَة
يا الضوْ مِنُو الفي الكونْ يصدِّق كان هِنا شُفَّعْ بيلعبوا جَمْ بَعَضْ
دِيكْ لِفّتُنْ في الدِشِّي غَبْشِي مَشكَّنَة
واللاَّ الشَتِلْ خايِفْ لها فارِدْ ضَفايرُو وحاضِنَا
فِيقْ لا تضيقْ
باتْ الفَرِيقْ بَهَجِي ومَتَمْسَحة بالمِي
وين يا الضوْ نَقاقِير الهَنا
ووِيننْ مشاوِير الفرحْ غَزَلْ البناتْ
الهُودَنَة
حَشْ البراسِيمْ العصُرْ الليلْ وَنَسْتُو
الشيْطَنَة
وعِندْ الفَجُرْ كمْ مِيضَنَة
وهَذَرْ التلاميذ الصباح
بِي جَمْ رواكِيبْ الحَلَبْ
يا الضوْ بِيُوت الناسْ حياتا مَبشْتَنة
الحِلّة كلَّها في البحَرْ
كَسَر البحرْ
ولاَّ انتَحَرْ قلبْ المياهْ
واِنكبَّ قَبَلَكْ وحْدَكْ
ضاضاك فِ بلدكْ شرَّدَكْ
نَفَدتْ قوافلْ الأغنياء وجملك على الحصْحاصْ بَرَكْ
مرتاح حمامُن في البروجْ وإنت
أب حماماً طاشْ يلُوجْ
لا سوَّى عشْ لا ركَّ رَكْ
يا الدنيا كيف مِتْقلْبِنة
تصحَى العصافير الودِيعة ،
مع الصباحْ مِتْخلْقِنَة
وشرْ الكلابْ مِتْمسْكِنة
وين نْرَّتـا وهِوْهِيوَا وينْ الليلِة غابْ
كلبْ الجَنائنْ زيُّو زيْ كُل الكلابْ
كلبْ الغلابَة المُسْتَغلِّينْ العَبِيدْ
الليلِة سِيدْ سيِّدْ مُهابْ
كلبْ أبْ زَهانَة تَهِينُو هانة ،
مِن المهانة تقولُّو تَكْ
حُكْم اِنقلاباتْ التَسَابْ
دوَّارَة دنيا فَرنْدَقسْ
نِنْجارَى فيها سبقْ سبَقْ
نخسرْ بعض في هِينْ ترابْ
نتلاوَى عند فتحْ اللَبَقْ
فاكرين برانا أهل العقابْ
تارِي البحرْ عَوَّافِي عندُو معانا حَقْ
يا الدنيا زيْ سكْرَة وتَفِكْ
مِنْ راسُو فَكْ
بعضْ المسافاتْ اِتْلَغَتْ
الفارغِة طَنْبَجَـا والملانِة اِتفرَّغَتْ
الدَنْدَهُوباتْ زيْ بعضَ
شكل العِديدِى ورَصّها
نَفس العَنَاقْريب نَفْسَهَا
عَفَشَك دَة ،حَقْ غِيَرك تَشِك
يَدَخل فى بَالك أَلفْ شَكْ
مَا الحَالة اصلاً مِن بَعض
حكم إنْقِلابات الَتَسَاب
الدِنْيا كُلَهَا حِلّتك
تَنْضُم مَعَ اَلَفِى آخْر الَبَلَد
مِن غِيْر تَفُوتَا مِحِلّتك
تَحْكِيْلُو قِصَة تَقِصّها
إِنْ نَفَسُو فِيْهَا تَحِسّها
إِنْ مَاها فِيْهَا تَحِسّها
حَتَى الأحَاسيِس نَفَسَهَا
مَا الَحَالَة كُلَهَا مِنْ بَعَضَ
إِلا الَمَسَاخِيْت الَدِقُون
خَتَوُهَا بين أَهَلَك قَرَضَ
بالَدِيِن وبالَطِين بالَنَسَب بالَمَيكْرَفُونَات بالَخُطَبَ
بالَبَنْطَلُونَات بالَرُتَبْ فرِّق تَسُد
تَاخُدْ قَنَادِيلَك تَفُوت
وإنْكَتَلُو فِى حِزْمَة قَصَب
ويَوْم التّصُد تَلَقَى الَبِيُوت
فِى أزْيَارَهَا بَانِى الَعَنْكَبُوت
والَحِزْمِة شَاَهَد فِى التُّرَب
حَرَسَك يِظَمْبِر مِنَهَا
وفَرَسَك يكُد لا اسَيَادَهَا تَسَأل عَنَها ولا زُوْل يَرُد
أرْخِيلِى اضَانِكَ يا بَلَدَ
مَرّة اسَمَعِينِى مِن الَبَعِيد
وإنْطَارَشِينِى وللابد
فِى حَبْلى مَاتَت حلتِى
مَاْت بيْتى مَاْتَت شتلتى
لَكِنِى يُوم مَاَت إِتْولَدْ جُوَاَى
الفَ إنْساَن جَدِيْد
وانَا ذَاِتِى مِن ذَاتِى إِتْوَلدْ
وَرَتْنِى مَلَتَى مِلّتى
والمُوْية بَدَلت الوجُوه
يا بَادِى مِن بيتَكَ تَتُوه
تَضهَب ضِهِب
لَوْ بَاَبُو مَافى أو العَتَبَ
تَحَسِبْلو مِن قَوْز الرَمَاد
أو بِيْت أمِيْر المُؤمنِين
ِاللِسة حِيطُو تَسِوى رَبْ رَبْ در دَرَبْ
والَدنْدَهُوب إنْدَكّ دَكْ
هَرَسْ القَزازْ المُوية جازْ والجازْوَدَكْ
بِينُو الدقِيقْ إتْلكَّ لكْ
ضِلَفْ الدَواليب الكُبارْ عائماتْ خَشَبْ
المُكْحَلِة الكُشتينة مِيزانْ الدهبْ
ضُوقْ الغضَبْ
ضُوقْ المَذلَّة الدُسْتـَبا الناس العُزازْ
سِيدك دخرنالُو المطرْ
أمَّا إنت يكفيك الرزازْ
خدرّتَ تاني يجي الجَرادْ
أقوى الحقيقة من المجازْ
وهِنا المحكْ ..
يا أرزقي يا نسلِ حمّالةْ الحطبْ
يا مستفيدْ مِن بذَّةْ أطفالْ السوادْ الما نزلْ فوقُن ملكْ
بالسُكرْ العيشْ السمادْ
المُويَة أوْلى من العبادْ
في ياتْ كتاب دين ياتْ حديثْ يا فاجِر الله بيسألكْ
يا حَسرةْ الإتغشَّى فيك كَبَّر وراكْ جاهد جهادْ لامن هلـكْ
يا حَسْرةْ الصدَّق صلاتكْ وموعظاتكْ في الفسادْ بان الشَرَكْ
أيْواتَ ليك ايوا تلك
أيْوَة أيْوَة يا بحرْ التسابْ ما أعدلكْ
شُكراً جزيلاً يا بحرْ رغم الكَساد
بحَّتْ لنا العَفَنْ المَكرِّنْ في الزمنْ
من عهدِ عاد
والضوْ وليداً ما قرا
خرَّجتو منك باقتصاد قانون فلكْ
جَفَّ المِداد ما أعدلكْ
ما أعدلك ما أعدلكْ
بالسكَّر العيشْ السماد
المُوية أوْلَى من العباد
يا شارعْ الثورة القصاد أهلي المسالمينْ البعادْ
يا بندقيتو هِنا المحكْ
*******
وقَبَّل على القِبلة ونَدَهْ
قُبَّالْ يمد إيديه إنتَبَهْ
حِسْ المطرْ بين الشدرْ
والضوْ مع الفيها إنشَدَهْ
بَرَّة المطرْ
في الدَنْدَهُوبْ برضُو المطرْ
خَتَّ البِرِشْ فوق راسُو لكِن المطر
أوْوْوْوْ والهوَا
وراسْ تمرة فوق عَقَشْ المسكينِة
الجَرِيدْ رمَى دَنْدَهُوبا العدِّة فاتتْ بالبحرْ
بِرِشْ الصلاة اللافْحُو الهوا وإبريقْ يثرثرْ بين كَررْ
يا الله سِتَّها في السفر
والضو ينط من دنْدَهُوبُو

--------------------------------------------------------------------------------
..مصابيح السما التامنة....وطشيش

يا جاي مارق
من دخول الغيث
شرايين التراب
السّايفَة..
أوردة الوطن
قَشَرَه اليباب..
نَشَرَه العطش..
كُلَما سرت
قطرات درب الرحمة
في جوفو
ارتعش..
بال الشدر
حال العصافير
الخياله
مع الدغش
مشدوه
متل خاطِر طفل
من ضُل ضهر راكُوبة
فوق حافة حجر
واقع سَحر..
واقف
يعد نقط المطر
ويتمطّق إحساس السحاب
بين لهفة الطين
والشمش
لمّت وراء طَرَف الحُقاب
أخر رمش
باقِيله
في عِب الشفق
والليل ملقّيِله الطرف
طَرَف الغسق.
...
شفق المغيب..
قفا غيم بِهت
كان نفضة الريشة الأخيرة
حَمَاره
فوق لُوحة الوكت..
يا كركَدَايةَ الله
إترشق ناقع عصيره
من إيد ملاك
فوق المغارب
بي تِحِت.
كانت مراكيب
حين صلاة
والترعة قِدّامن
طَشِت
ولا المراكب
من بعيد
ودعات علي
النيل
والنخيل المتكِي
دار يقرا البَخِت..
قنّب يحِت...
قلّع زريزير
غفوتو
عضّ إنطلاقة
غنوتو
وقام منحفِت..
والكمبو
ينشاف
من مسافة
قطر بضاعة
العربجية الطيبين..
سبّابة
والمتسببين..
شعراء ومغنين الأنادي..
أنصاص لصوص..
حلب البلد..
عرب الجبال..
منسللين من لا تحت.
والريح يشيل للنيل
من هرج المغنّين
الدعايات
نشرة أخبار
الولايات..الوفيات
الملايات..العبايات
المرايات..التصاوير
التعابير
الحكايات النِكـــِت.
عشم البنيات
في الضراع
الضاع
وكت حرّ الكَفِت
زاغ الصراع ذات جمعة
قدّت من وطن
توب السبت؟!
نَقَد الحَمام
خُرجَ الوكِت
طارت لو نقطة لحظة
من مية ملح
في حلقو
مرّرت الهديل..
كَمَد الجرح..
جَبَد السكات...
لكنّو فات
وأَبي يتلفت؟
...
بال الطفل
يرقِل
علي ضهر الحمار
يجمع مصابيح
السما التامنة..
ويطش
ينكربَش الحلم
البَعَد
قرّب يوافينا..إبتعد..
لو مدّت إيد
كان إنجبد..
يا الدنيا..!
بي ريحة الدعاش
لو تنعرش....؟
أو تنفرش
تحت الفراشات
بالبَرَد؟
فوقَو الوعَد
صادق يمش.
لو يلقي راس
رسن الزمان
ديك لحظة
ما كانت تمش
شان يندهش
أو ينبرش
بين نجمة الملكوت
ونسمة رضية
من رب العرش
...
يا غادي منك
فوت كلام الشوق
من القلب
الخشم بابو البلد
لو خشّ هدهد
في رماد ما فيهو
يمرق قانقرد..
والقانقرد
بابُو الحمام
راجيهو
لمليم الطيور..
ضمة جناح..
صمّة عدد..
قادرات علي
صد الحِدَي
جاسرات علي
صقر النكد.
إيدين بِنيات الفريق
بتهدهد الطفل الرضيع
بتعدّي شيخ
دومة الحفير
تشلَخ لَبَق..
تسقي الخدير
بتعوس
وتفرك للملاح
بِتَوَرّقَ اللوبي
وتحش..
تمسك مراح
تَحَلِب..تخش
تغسل هموم ايامه
في طشت الحِلم
تنفض..تَشُرّ الشوق
هِدم
تنشل من البئر
أُم تلاتين باع
تعَتّل..
تفزعَ الطيّانة
لو ما تجدَع البّانة
بتجيه بيوت
تغزل خيوط
بتطرّز المنديل
تخيّت لي طواقي العيد
صَبُر..
بتتبب السجاج
مع الفجاج..تقوم
إيدين بنيات الفريق
بتحش تمر..
تخرت سبيط
بتعتق الدكّاي..
وتخبز للصفاح
بتكفي عيزومة
وضيوف..
بتغنّي قيدومة
وتطوف
بتهني..
بتودي وتجيب
بتحنّي..
بتدلّك حبيب
بتولّد الأمّات..
تربي علي الصلاح..
زي ماب تضمّد
للجراح
إيدين بنيات الفريق
إن داهم الحلاّل
خطر
قادرات علي
شيل السلاح.
,, .. ,,
يا..مناحته
وبلاّله
يا..رجع اللي راح
يا ود عيون..
فِرحَن..بكَن
تِرحَن يغطســِن
في الدموع..
الدنيا عامرابك تظل
وإن كان رحيلك
فرتَكَه
أو يا لسان نار الصراع
لهليبه بعدك
لو هكَع
مين شالّو شيلة
بلا اتكّأ؟
...
مع إنو صبرك..ما نفَد
برشمتَ
أو كبسَلتَ
كيف؟؟
سِعة الوجود
في ضيق لَحَد ؟
باغتنا ريح الفجعة
ليل
فَرنَب في جوفنا
مَرَابَنات الصبر
شات ســِعن الجَلَد
صادنا الذهول..
زي التكنّو
قٌبُل دا .. ما فارقنا زول
بعد الرسول؟؟؟
... ...
واللاّ التقول
أوّل قلوب
في الدنيا
يغشاها القدر
بعَدِن
تضيع منّو الدروب؟!

تِنطَمبَج الساحات
حريق
يدغي الطريق
المحتمِل
كلّ الفريق
سوقَر وراك
يا جرحنا ..
الكيف يندمل؟
ما بار وراك شهدَ الغُنا
ونَحَل الحناجر
ما هِمِل؟
صادر خلايا أبو الدَبُر
صاقر حناياه
نَمل..نمل
...
...
وين ماشي..
يا نبض الرحيق
سايب المشاعر
ريق دقيق
نهب المغنّين
التِفِل ؟
غنواتن
الورطانة
أو لوطانة
في الريد المَقَق
حُترُب صفَق..
في طين ذِبل
أوصاف علي جسد الحبيبة
بَهَق..بَهَق
تحت احتماله مَرَضرَضَة
زي لعبة ما استهوت طفل !!!!!!!
... ...
وين داجّي
يا قمر الهنا الكرّمنا
عند مغرب مَرَق
سايب لياليك
لي نجوم
واقفات وجوم
علي فَد رجِل؟!
وفرع الغُنا
الميّل هنا
علي مين وراكَ.......حيتّكل ؟
والشيل تِقِل ؟
.... ....
قَدر اليشيلو الشيلة
في
لكن ظروفن
هل تفي ؟
تحتاج جماعة من الرجال
الكنت ليها براك تقِلّ !
دارت قبيلة من الحبال
الكان يقيله فَرد حبل...
--------------------------------------------------------------------------------
يا متخبية خلف وضوحك
***
محمد الحسن ســالم حميد

يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك ؟
--------------------------------------------------------------------------------
لبن الطيور

يوت قلبي يدّي قبل تدور
طول حبِّي ديمة قَبَل عينيك
فضَّل لي بس لبن الطيور
ما خِبر بكانو أجيبو ليك
*** *** ***
لامن زماني عليّ يجور
أكمد كياني صبر وأجيك
وما ألقى خردلة من شعور
طيِّب تخيِّب ظنِّي فيك
*** *** ***
شقّيش أقبِّل وين أروح
وأنا تاني مجروح من وشيك
يا غربة ياليل يا نزوح
دغش الغبش ما بات وشيك ؟
**** **** ****
يا غلبي كلما الليل دخل
ياني المغنِّي "النجمة ديك“"
ولاَّ القِدر يرجى النخل
لامِن يشيل قادر عليك
**** **** ****
يا ريتني خلّيت الرياح
في الغربة ترميك بالأسى
من قلبي ما دلّيت جناح
يحميكَا في ذاك المسا
كان ما إنجرحت بلا الجراح
الفيِّ قبلك أوعسى
صبراً عليك محقتو راح
يقدر عليها ييبسه
*** **** ***
جيت لي غرد وأنا قلت بلد
لمتنا في المنفى القسى
طول عمري لي عينتك مدد
حين أحسى غيمتك تحبسه
*** *** ***
زول حاضري بالصدفة إستراح
في ضلِّي أول ما رسى
وجكّن جرابو نساني راح
وفضَّل ضليلي المانسى
…. …. ….
ليمونة فوق أزيار سبيل
عابث عياني يقصقصه
لابدّ من صبراً طويل
شان يربى شوكه ويحرسه
الغربة
***
الغربة وين بكانه
أماني حاري حرِّي
ذهللنا من بكانا
وصبرنا جاتو ذرِّي
**** *** ****
تشوفه برتكانة
نجيضي علِّي مرِّي
ترا الجبر تكانا
بلا إرادي حرِّي
*** *** ***
فيا ربوع بلدنا
ويا ضروعنا دُرِّي
يموع عرق جلدنا
ودموعنا فوقو خرِّي
*** *** ***
تقول بنيتي سارَّة
"كتبتَ ليكَ بدري
رسالة من مِي حارّة
بقت دموعي تجري ...
شنو الحماك ترُد
وبالحالة يابا تدري
لو ماك بعيد بُعُد
جدي الغزال مو قدري "
*** *** ***
عجيبة يا بنيَّة
متين بقيتي تقري
كبرنا كُر عليَّ
وعلى بحرنا كُرِّي
*** *** ***
مع السلامة ماشي
بلد دا ماهو قبري
محل يكون فراشي
في قبلي ولاّ بحري
*** *** ***
عفيتو ليك معاشي
عليك يا الله أجري
تعب معا غباشي
ولا ذهب بعمري
*** *** ***
صبرت قطَّ صبري
صَبَر حفتَّ صدري
لقيت غلابة تشري
من السحابة كِسري
--------------------------------------------------------------------------------
وأيه الدِنيِى غير لمّة ناس فىخير
أو ساعة حُزُن
,,هناك ثنائية رائعة بين حميد والراحل مصطفي سيد احمد ,,, فيها طعم بساطة الكلمة ودخولها الي القلب مباشرة مع صوت مصطفي المليان حنية وانسانية ووطنية.
طــيبــة

محمد الحسن سالم حميد
كل ما تباعد بينا عوارض
كل ما هواك يا طيبة مكنِّى

تلد الغربة الكُربة الواحِد

بيكى أسمى الشوق وأكنـِّى
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا بيوتى
لا غيرت وراك الجِتـّة
لا بدلت ملامح صوتى
لا غافلنى وهادن فنى
غام لى المدن الما عِرفتنى
تبن الشوق الصبرو مصوبر
للأرياف الكم وفّتنى
وللأطفال الناشفة ضلوعا
ونازفة بغنى
أطمن روعا وأهتـّى دموعا
ببسمة بكرة اللاّها تمنى
ولا مصنوعة
أغنى لشعبى ومين يمنعنى
أغنى لقلبى إذا لوّعنى
مخيـّر دربى الما رجعنى
إذا طلعنى نخلة القرب
ولا الغربة الكدرومية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
أغنى الناس الما بتسمعنى
المِنِّى بعيدة ومبعدة عنى
النادا نشيدا وكنت المعنى
الإيدى فى إيدا وإيدا بتبنى
فى دنيا جديدة اليوم راح تدنى
وأريت غنواتى فى ناس شغالة
تكون سُندالة وعود طورية
ضراع رجالة كتاب أطفالا
وجملة بالا الما مكرية
سدّة مالا وبقـّة فالا
فى ليلة الدخلة
على أسمى قضية
حبيبة قلبى يا سودانية
ياأسمى معانى
فى زول بيعانى
ياود ضكران ويابتْ دغرية
وأنا إنْ سامعانى
فضـّلت أغانى غُـبش فقرية
وروح غانيانى
حويتك منك يادافعانى
براحةإيديا
ويا جابدانى برفق عليا
وما بتحيـّر بين الفوق
وبين الناسالتحتانية
إلاّ مغـيـّر ولاّ عقُوق
ولاّ كفيف الإنسانية
ومنـِّك وينيا كاشفة عينيا
بنور الإلفة ضِيا الحنية
وحِلم العالم ناس تتسالم
والبنىآدم صافى النية
والأطفال الناشفة ضلوعا
يطمِّن روعا
وتبدى تغنى
غناوىالبكرة
الكم مسموعة
حسيس طنبارة مع نـُقارة
صفِقتاً حارة ودارةتغنى
فيا حلتنا عليكى تـُرابك
وإنتى شبابك زينة الجَنـِّى
أحلى عروسالبلد اللّتنا
ولاّ الغُبُش الرّابّة تهنى
ولاّ هدير المدن التصحا

وتمحىظلام الحاصل عنـّى
نواصل
--------------------------------------------------------------------------------
تفاصيل ما حدث
محمد الحسن حسن سالم حميد

سكتّ .. نضم غُناي .. ورّاك ..
بدابك باتّكالي عليكْ
خَتَمْ بِكْ .. بي هروبي إليكْ
وكيف طفّرت صقر الآفة .. ما يلفح جناياً ليكْ
ولا يدخل مجال عشاً .. نسجتِ حنانو فوق إيديكْ
وكيف كوترت ريح الآهة .. ما يقرب فرح عينيكْ
وراء جبل الصّبر .. فضّيتو
والمطر الِحرِد .. رضّيتو
سُقتو على البلد ورّيتو .. ما لمّابا .. لمّا بياّ ... لمّا بيكْ
هادي الحفرة .. كانت بير .. وكان متكابي فوقها حراز
وتحتو الصخرة كانت حوض .. وكانت للقبيلي ملاذ
كانت ملتقى العُربان .. وكانت مُتّكا الِحبّانْ
ومركز دورة الإنسان
مِنّها هبّت الفرسان .. وعندها ربّت العرسان
وكم شِهدت غرام وغرام
وحِفضت كم كلام وكلام
تعكّر حين خصام وملام
تروّق حين وئام وسلام
تراشق أعين الأطفال .. تراهق للعصافير يوت
ترشرش لي تياب بنوت
جنّها من أعزّ بيوت
لا رفعت عليهن سوط .. ولا رفعهن عليها الصّوتْ
حين تملا القِرَبْ .. تِنْمَنّى .. تدّها صَنّة ... حتى تفوتْ
تسوِّي الصّجْ .. تَلِمْ الطّورْ
مديح الحج .. غُنا الطّمبورْ
تقوم تحتجْ .. تقيف طابورْ
هنا الشُّفع .. يمينك دورْ
هنا المارشات .. هنا الدّستورْ
هنا اللِّبّيشْ .. تدور وتدورْ
قريش يا قريش .. حبابا قريش
نزل مَلْك الحَبَشْ والدّيشْ
تدور وتدور .. قواها تخور
تلم أنفاسا زي عصفور
تِنَفّضْ ... تمش بالدور
بشيش وبشيش .. تشاقق بين تقانت العيش
وبرسيماً .. سمح مفروض
وما تهبش دوابا قشيش
بِنيّات الغُبُش شقيش
تودّي تجيب .. مع الدّوبيت
تِنْضَكّرْ خِدِمْة البيت .. مشى الواقود .. في كل عصير
لُقا المريود .. بدور بِدّيرْ
من الأخّير.. تخاف وتخاف .. تخُب السّير
عشان في كلام وراهو كتير
عشان باكر تعود وبخير
عويش في عويش
بنالو عشيش
حِدَيْ وجناهو ربّى الرِّيشْ
جناحو هبيش .. تملِّي ينيشْ
طفش قُمرِينا طار شقّيشْ
مطر يا خير .. مطر
ورا طرف الُحقاب كان روض .. وكان بيناتو خاوي غديرْ
كل الصحراء كانت غابة .... بي شُدرا الكتير وغزيرْ
صباح وهجير .. يهبهب ناز ..
حلاتا وفرفرات الطير .... وقت يغشاها مرة رذاذْ
قطيع غزلان .. نعام وأسود .. وروض وورود دليبن رازْ
مَترَْ مد البصر جنّات ..
خُدر رباها تور الساقية .. حرقت حين جاء بابور جازْ
دغيش في دغيش
حصدنا العيش
طلعنا مطالبين الخيش
والبتشوفو من أطلال .. دي كانت ذات وطن حَلاّلْ
بيوت ناساً كُرام وعُزاز ..
سوا سوا في رخا واملاق
منطقوا لوعة الإخفاق ..
قدر ما ظنّو في الجايين .. تمطّقو روعة الإنجازْ
حويش في حويش .. سكنّا الدّيشْ
أوضنا بقت نقاط تفتيشْ
هادي المملكة المحروقة .. كانت جيهة
وكنا نجيها
مستشفانا .. كم كفانا .. منو نطيب ويتوفانا
كانت نادي ... كانت ورشة .. بوسطة ألّتنا
كانت مدرسة وقبلتنا
لي حِلّتنا كانت سُوقا
لا وقعت صواقع فوقا
لا غضب الله شلّ عروقا
ما من حرب قامت فيها .. لا سقطن قنابل وغازْ
كريش في كريش .. سِعِرْ درويش
دوانا علمنا بات مافيش
كُنّا وكُنّا .. ياما عُزازْ
--------------------------------------------------------------------------------

ولحظات التلاقى لُذاذْ
هِلِكْنا وكت وِكِرْ تورنا .. ودهتنا بصيرة الإنقاذْ
هويتنا إتلغت فينا .. بقينا اعجازْ
زمن خاوي وحقيقتو مجازْ
بشيش في بشيش غلبنا نعيش
قبض والي البلد بقشيش
في الزول الخرب لي بيتو
غالطني المطر .... هَدّيتو
لاواني الفراغ .... لاويتو
وكان أقوى الفراغ ما لاي
شَهّدتَ البرق .. مَضّيتو
نشّن قوس قزح ... تالاي
اندرقتّ باللاّشيء .. وبالمافي اتحويت في قفاي
وقعتَ وراي .. رفعني يقين .. وَقَفْ فوق راي
بأنو الحال مغير زين .. مغير كان قِصِرْ كان طالْ
وإنو الأرض للكادحين ... ومفتاح الحياة العُمّالْ
رَكَزْتَ على غناوي الفال ..
لساني سنين .. وحاضر بال
فنّا لي التعب .. موّالْ
شهرت على المناحة غُناي
فزع صبر الغلابة معاي
وكت ناديتو
كيد الكايدين رديتو
خاواني المطر .. خاويتو
فوق ضهر الهوا .. الشدّيتو
سقتو من الخراب .. وديتو
لي تالا العمار منصاب
فما كان العمار قدامو .. غير قَلَبَاتْ حلمنا الخابْ
طشّ ضباب .. رهاب ورهاب .. شال نفسو المطر .. ختاهو زي ممكون
خَنَسْ .. لحظة خنس قُتْ مات .. رفس تَوّر بخاراً باظْ
رطن بي كل لغات الكون .. وبوّخ .. دوّخ الألفاظْ
كيفن كان .. وكيف حا يكون .. تافقني الغُلُب حين قالْ :
(هربتو ونمتو .. قمتو اعجاز
إنورطتو يوم فرطتو في ماريل بنية الماظْ
ترباة عِزّها التاريخ .. ضراع الكُدّح الأفذاذ
حبيبة جملة الشهداء .. الصِّح الإعجاز)
قال قولو المطر .. وانعدّ فوقي بخار
ركضت وراهو حتى النار
وانترتعت بين التار وبين الشارع الما ثار
وسدّ قصاد عيوني شعار
رافعاتنو في إصرار .. نقابات الهوى الأشجار
بنات الواطة والأنهار
خيوط العنكبوت .. وحمامة خَبّو الصاحبين في الغار
رافعاتنو حتى الشوق وقع من فوق ... وجاهِن تار
صرخت .. فركت للأشجار
في الأنهار نفخت النار بالهواء .. يا جماعة الغار ..
اعصروا على بعض ساريتنا لا تنهار
نشد الحيل .. نعد الخيل .. نسن الصارم البَتّارْ
وكلها كمّها الربّاطة .. بي لُقاطا واحنا كتارْ
صفاً واحداً كالنيل .. وقلباً حارْ
نضاري الواطة بالضرعات .. من الزمن الكركي الضّارْ
وهاكُن شتِّتُوني بِذارْ
صرخت .. صرخت .. حتى النار
كشحت على الطناش مسدار
أجابني الصّي .. وأبو التي تي .. كلاب رمل الهجير الحارْ
وبديت احتارْ
انا نمل المهل قد ضاق .. أم ارضة وجربت حُجّارْ
بديت احتار .. وقام فيني الجرح تاوارْ
رجعت نزفت .. صابني دوار
قضفت حشاي .. جرت بطني .. ووقعت جنازْ
تحت صوت الصنين الراز
بقيت بين الأرض والغيم .. والدم الجمد والغازْ
مطفح زي هتاف مهزوم .. مطلوح طوف نجاتو الضيم
جبدت جنازتي للحجرة ..و وقدتها نارْ
لمحت وراء دخانا غبار خيول كاكية تنخابت ..
يكون من تاني دفتردارْ
طريت تاريخي في لحظة .. نسيت ما طريت ..
وفي طيف بيت دُمى واصنام
تكلت جبيني تالا السام
جعرت شديد .. وبي ساسوية ... فكيت راسي من قدام
لقيتو ضلام
لقيت ذاكرتي معطوبة ومعضّي كلام
مفوتة في انفلاتة سلام
صدى الأيام معمّاها
خواخي الكتمة غاماها
خيوت النسمة مشطوبة
خطوط النسمة مشطوبة .. ومداراها حطام
خفت من انفصام .. قوام قفلت دماغي واستلقيت على طوبة
ورجالة غفيت
نجيت من سهد كمين عام باعجوبة ..
غشاني منام
في أول دفرة في الأحلام
حلمت .. جمعت في راس خيط .. أمان وسلام

--------------------------------------------------------------------------------

بين الموجة والخزان

محمد الحسن سالم حميد

سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى
هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيتو تنجمّى
تمرقى صبوحة لى الجيران
قدح فوق إيد ... وفْيد ألمى
يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوفعينى
على الأبواب .. طواريها وحواريها
بقت روضة
بقت تشرب من الحامداب ..
تشوفى رهاب ... بُعُد نجمى
.. بشوفو قريب قُرُب نضمى
بشوف العالم التحتانى هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمارأفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..
عُقُب يبرد حشاك .. يا أمّى
وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْسمّى
سلام يا أمّى
سلام لا هكمى .. لا دكْمى
--------------------------------------------------------------------------------

الجابرية

محمد الحسن سالم حميد
كان ضحوية ...وكُنَا نسنِّد في المحروت
وفجأة يهّوي مَكبر صوت
قال : الريس مار بي فوقنا
من شغلتنا قلعنا عِروقنا
فكَينالُو حبل وآسوقنا
وإنماسكنا يطمّن روقنا
قمنا جميع الحلي مَرقنا ...
البيشوفنا.. يقول وآآ شوقنا
كان ضحوية ... وكانت عين شمس الله قوية
وكان الريس في عَربية ...
واقف طولو.. تحت شمسية
هللّنّالو ... هلّجنّالو ...لوّحنّالو بالطورية
فرَّ عبايتو.. وهزَّ عصايتو ...
وهزوا بنادقن الضابطية
صفقنالن.. صفقة قوية
زغردنالن ... يويا أيويا
هدّن عندنا خمسة دقائق
قدمنالو كتاب الله ...درقة وسيف ... تبروقة هدية
.. قـُـفّة تمودة .. وفاس دهبية
وكنا قبُل بيّتنَا النية ...
بين بتين علّينا اليافطة ...
اليافطة أم زيق الدمورية
وانعبينا هتافاً واحد :-
الجابرية تحيّي الثورة ...
دايرين بوسطة ومدرسة وسطى
الشفخانة وسوق منضبطة
قام الريس.. روّح باسم
وقام خاطبنا بنهج الثورة الصارم وحازم
أمّن.. لازم من شفخانة ومدرسة وسطي
والتعمير بالعون الذاتي
إلا البوسطة .. دي ينظر فيها
أما السوق ... السوق منضبطة
للتُجَار الأسعار واضحة
وللمستهلك باينة وواضحة ...
جاملتوهن تبقى الغلطة
وإنكفّينا
رفعنا إيدينا ...هزيناهن بالتأييد:
لا تفريط في قوت الشعب ...
سحقاً سحقاً للرجعية
الجابرية ضراع الثورة ...
بالإنتاج حنبني بلدنا
كانوا في جيهة .. وإحنا في جيهة
هن ينهبّبّوا بالكابات ...
وما همّانا الصيف وعَرقَنا
فات الريس وإنفّرقنا
إنفرتقنا على الجابرية
كنا ببنضم وما صدّقّنا
بالجابرية تجيها البوسطة
الشفخانة ومدرسة وسطى
قلنا يا ريت لو وصلوا فطور
وإنحزّمنا ضبحنا التور
كُنا أقلا ضِمّننِا النور
أو يا ريت لو زدنا الصفقة ..
وعاش ويسقط ويويا أيييويا
كُنا أقلا ضِمنا الموية
كنا بننضم بي إيدينا ...
دا أحسن ريس مَّرّْ علينا
ومن الله خَلقنا وشفنا خِلقنا ...
دا أول ريس زاتو يجينا
وكونو يجينا
يقنّب بينا...
يشوف البينا .... كفاية علينا
آ الجابرية يجوكي الحُكَما
آ الجابرية تواصلي البرة
آ الجابرية ولادِك تقرا
نمشي الليلة نصاقر الرادي
نمشي الليلة نحضر النشرة
وكنا نرجِِّع في كلماتو
إلا في ستة من الجابرية ...
قالوا .. تعبكم خارم بارم
يذهب حاكم خلف الحاكم
والجابرية تظل في حالها ...
حِلّة حياتا تسُر الظالم
صُدفة تموت وتحَيا اطفالا
لا جلكوز لا تقرا رسالة
ولا .. راح يطلع منها عالم
ما بينصفكم إلا ضراعكم
عّبّوا ضراعكم يا رجّالة
وخَلّوا بصركم دغري وسالم
حُكم العسكر ما بينشكر
كلو درادر ... كلو مظالم
وما هو قدركن تَحيو همالة
مقصودين والقاصد فاهم
وقاطعناهن ...
حاربناهن..
تميناها البينا شتائم
حالتُن أحسن ناس في الحلة
إيدا نزيهة ... عقولا نبيهة
قلنا بَعرفوا ... وقلنا فواهم
يطلعوا فالصو.. وقٌطّاع رحَمة
عينة شماتة وخارم بارم
وإحنا القُصّر واثقين فيها
وقطّعناها معاهم جملة .. وقاطعناهم
صاروا في جيهة ... ونحن في جيهة
ومر اليوم ... الشهر ... الحول
والجابرية بلد في حالا
قواسي شيوخا ... مآسي أطفالا
عذابات ناسا
من القُرّاصة ولي قَرّاصا ...
... حلة تعافر ومقطوع راسا
عشرين كيلو من الجابرية ...
صِبية تساسق بي كراسا
آ الجابرية عذابك فينا ...
لاكي القرية.. ولاكي مدينة
وفد في وفد يقوم ويجينا
... دايرة دراسة وإجراءات
عون أمريكي وقرض ألماني وحاحاءات
وحد ما نشوفلنا مسعولين ...
مسعولين أو خواجات
نجري نلم قدحاتنا عليها ....
ترطن ترجع زي ما جات
الشفخانة وعايزة دراسة ...
مدرسة وسطى وإجراءات
ولما المطوحة طالت بينا
إنذكرنا العون الذاتي
إنحزمنا وقلنا برانا ... نبني نقوًم للشفخانة
طوبة في طوبة وقوّمناها
ويوما التمت .. جات السلطة ...
عربي وعجمي ومرة رطانة
الشفخانة دا ماهو بكانا
وهاك يا تلتلة هاك يا ورطة
وغصباً عنك يا الجابرية ...
وغصباً عنك يا أحوالا
وحُميّاتا وموت أطفالا
وحُمرة عينكن يا رجّالة
قوة انشكت بين النقطة
وفي الجابرية تحوم الشرطة
هووا كلاب الحلة وصنوا
ومن يوم داك ما شفنا السِتًة
................
وفد الحلة السافر جانا ...
قال إنأكد شاف الخرطة
ونحن بدل نبني الشفخانة ...
إنسرعنا بنينا النقطة
الشفخانة دا ماهو بكانا ...
وكانت غلطة انقلبت ورطة

إنفاهمتو مع المسعول ؟؟ ؟؟؟

إنفاهمنا مع المسعول
وقال حا يقوم للشفخانة
أو يدفعلنا حق اطيانا
مع إنو النقطة وكت بُنيانا ...
قوَمتوها بلا زنزانة
وفي تقديرنا كلام معقول
كونو يقوَم لي الشفخانة
حاجة تضحك
محرقة هانة
إنتو تقيفوا مع المسعول
وألا الكنتو تقيفوا معانا؟
قلنا:-
خفنا نفقِد الجاي ...
خفنا نفشّل باقي الخطة
هو فضل جاي ؟ ... هي فضلت خطة؟
وانفرتقنا على الجابرية ....
وانعلقنا
تجينا البوسطة ومدرسة وسطى
والشفخانة قصاد النقطة
تجينا ... تجينا ... وما أنيقننا
ناس إنولدو ... وواحدين ماتوا
لما الريّس ودوشتو فاتوا
وبعد خراج أرواح وعذاب
فاتوا العسكر وجو الأحزاب ...
ونفس الوجع اتجدد تاني
ونفس الحلم الراح تحتاني
حتلناهو ... جمعنا رفاتو
نفس اليافطة في نفس الحتة :
الجابرية تحيي الشعب
دايرين بوسطة ومدرسة وسطى
والشفخانة بديل النقطة
فينا انكلم شيخ الحلة
صنقع ...دنقر ... صلي وسلم
وكانوا كلاب الحلة يهووا
وقال كلمتنا تكون فد واحدي ...
شان ننقوى وما ننزلا
شان مشهادنا وعدل الحلة
نحن نفوّز شيخ البلة
وزاد هوهيو ... كلوب الحلة
وبعضنا عارض ... رده وفاوض
شيخ الحلة القام حمسنا ...
بلة الحمش الزول ما دلة
أول فاهم.. وقبلو ولدنا ...
وراح يحكملنا بشرع الله
هو .. هو ... هووا كلابنا
لما أستغرب شيخ الحلة
وإنفرقنا على الجابرية
إنفرقنا ويوم الليلة انجمعنا عموم الحلة
شيخ الحلة قرأ القرآن ...
صنو كلاب الحلة وهووا
وبلة إنقدم سمَّي وصلَّى ...
صنو شوية ... وهو هو هووا
قام وإنكلم ... عن ينكلم كان ينقسم
النسوان الجاي تتهامز
الصبيان الجاي تنغامز
وكان ينبسم ... وكانو كلاب الحلة يهووا
شكَّر وشتَّم ... هو هو هووا
حلَّل وحرَّم ... هو هو هووا
هوَّد وسابنا ... وفات ودانا الآخرة وجابنا
قاطعناهو وصوتو إنوطَّا
أصلاً واطي وتاني إنوطَّا
دايرن بوسطة ومدرسة وسطى ...
والشفخانة بديل النقطة
التموين وزيادة الحصة ....
كهربة موية وسوق منضبطة
بلة انبرع وقال ببنيهن ...
هو هو هووا كلابنا
واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا ...
وبي إذن الله يضوى الحلة
هتف الشيخ وهتفنا وراهو :
لا تبديل لشرع الله .... هو هو هو
لا ولاء لغير الله ...... طاء طاء طاء
عاش الفارس أمل الحلة
بلة الطاهر علي حسب الله
عاش الفارس أمل الحلة
بلة الطاهر علي حسب الله
.....
بلة الطاهر علي حسب الله
كبَّر فينا وقام إندلي ...
ولسة كلاب الحلة يهووا ...
وزاد هوهيون كبشاً ضاع
من مرحاتو وصاقع باع
بلة الطاهر علي بلاّع
.........
بلة الطاهر علي بلاّع
كانت أول مرة نشوفو ...
يومنا الشفنا اللاندكروزر
اللونا مخطَط
والبنوت الراسا مرَبط ....
التنبوبر
لوري مكوَّش أقمشة ..سكر ...
حتى الفوفو ... وعتل تؤجر
وأمحي المنكر بي معروفو
بلة الطاهر علي بلاع ...
أكرمناهو .... أكرمن ضيوفو
يشبه مرت الشيخ في وشيهو ...
لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برانا نغيير قولنا
إلا كبار الحلة بقولوا ...
بلة دا هولنا
بلة دا أصلا من ها الحِلة
إلا أنربى وقرأ في الخارج
رافق جدو الفتح التركي
وسيرتو انقطعت في المهدية
وررَرَة سمعنا أستوطن برة ...
وقام إنزوج من مصرية
جابت علي ... علي جاب الطاهر
حتى الطاهر خلَّف بلة
جدو انشيطن أخير ما لانا
بلة أنسركن وبقي مولانا وجاء وبرانا
أقرب واحد لي حاج بلة ....
أقرب واحد شيخ الحلة
بلة الطاهر علي حسب الله
أول مرة يصلي معانا ...قدمناهو وقم أمَّانا
صوتو مرخرخ لامن يعرأ
يقرأ ويقطع .. زي البطرا
لامن يركع جسمو متختخ
عند السجدة سجودو ممخمخ
شيخ الحلة بقول عن امرو
زول غرقان في الدين من عمرو
ستة سنين .. قابض في جمرو
وما فكاهو طريق الله ...
صوتو وِدِر من كترة ذكرو
وجسمو التختخو.. شدَة صبرو
قلنا حقيقة الزول بي عذرو
وفتنا قناعة.. ومااااانا قناعة
إلا الستة.. الصاروا جماعة
قالوا .. دا زول تربايته مياعة
ما يشبهنا ورفعو وضاعة
زول زول دنيا ودنيا صياعة
قصة دينو ودقنو بضاعة
وإحنا أصواتنا ... يا إما مباعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ... ومدرسة وسطى
والشفخانة وموية ونور
كونو يجيبا دا ما منظور
وزيادة الحصة ... الزول زول سوق
زول من جدو يلف ويدور
ويا الجابرية دا مطلب عادل ...
كونو تطيبي ... تكاتبي وتقري
ضوك يشلع ... دشك يرشع
ونحن دفعنا ضرايب بدري
ولسه بندفع ... لسع ... لسع
بس يا جماعة ... إن قضينا حياتنا تباعة
وصنيت رادي ... وقول في الفاضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن يا رجَالا...
وخلو بصركم دغري وسالم
عبو ضراعكن آ رجالا ...
شيخ الحلة أضلَّ وضلَّ
وأسألوا بُرَّة وحاجة السُرَّة
عن التيبان وحكاية الصُّرة
شن لمه بلة وشيخ الحِلة مع شرع الله
والناس ديل العارضين برة
جربناهن كمين مرة
وتاني نجرب شان ننضرَّ؟!
ويا الجابرية معاكي سلامة ...
كان الفوقك ما فات مرة
كان كلماتن ناشف ريقا ... كانت مرة
إلا حقيقة ... وغلبنا نطيقا ...
وين في الصُرمة ... وقِل القدرة
وسكتناهن بس ما صنو
وقاطعناهن تاني المرة
وما من واحد فيهن ترَا
وبلة
كان هو طريق الناس وخيارا
فوزناهو.. وجانا زيارة
كرمنالو التور وعرضنا ...
وخليناهم برة الدارة
دايرن بوسطة ومدرسة وسطى ...
موية وكهربا والشفخانة ...
زيادة الحصة وسوق منضبطة
وصدو كلاب الحلة يهووا ...
ينضم بلة يهووا معاهو
نهتف نحن يزيد هوهيوا
مافي شهر جاتنا الخرسانة ...
جانا السيخ ... الطوب ... الرملة...
جا الأسمنت شكارة شكارة
عديناهن ألف شكارة
وكرمنالن خيرا جانا
وكل كلاب الحلة الهوَّن ...
طفشناهن بالجبخانة
وفي صنانا تدودي الزانة
إنغالطنا كتير في بعضنا ...
أولى المدرسة واللا البوسطة ؟
أولى المدرسة
والشفخانة ؟؟؟؟
الشفخانة محل النقطة
ونان النقطة؟؟؟؟؟..
.نحن أهالي ... وودنا صافي
بيننا معزَّّة جرائم مافي ...
وما بنحتاج لي شرطة ونقطة
تحصل عِلة في شيخ الحلة
ونان النقطة؟؟؟؟
نحن الإيدنا بنت للنقطة ...
والجيَرنا زبالة أطيانا
ناس السلطة إن دارو النقطة ...
يمشوا بكان أرض الشفخانة
وما طالبانا خلاف زنزانة
مدرسة بوسطة ... مدرسة بوسطة
ستين طلبة وعشرين أوسطى
شغالين ما ملَو سخانة
مدرسة بوسطة ...
وقلنا غُنانا:-
يا الجابرية الله أدّانا...
حاج البلة المبروك جانا
جاب المدرسة جاب البوسطة
وبكرة يرجّع للشفخانة
نصحى نصابح موية الدُّش
نمسي نلاقي الضوْ عمّانا
مدرسة بوسطة ... مدرسة بوسطة
وتاوق ... وتاوق ... وتاوق ...اخ
وفجأة تبين تتضخ الخرطة
وكب تنتصب الميضنة ...أخ
أخ من حظك يا الجابرية
سابع جامع في الجابرية
سابع جامع وبالجبرية
وصدوا كلاب الحلة يهووا ...
أخ يا الناس الحالن قطَا
في البلدان الحظها فاجع
بق يا الصاح الماك متراجع
وحرِّق دبش الدنيا الغلطة
بق وانفرَق في الجابرية
بق في أرحامنا في شافع نافع
ترفعو أمو في حيطة الجامع
يكتب .. (يسقط دجل السلطة (
ويسقط بلة وشيخنا التابع
كشّفناك وكشفنا الخطة
تحيا كلابك يا الجابرية
ويحيا ضراع الزيتن طالع
والبيصارع مُر الواقع
تحيا ترابك والطورية
الجابرية تحيي الشارع
دايرين كهرباء
دايرين موية
دايرين سلطة وسوق منضبطة
دايرن هسة زيادة الحصة ..
الشفخانة بديل النقطة
دايرين بوسطة ومدرسة وسطى
والله بنعبدوا في ايت حتة
دايرين بوسطة ومدرسة وسطى
والله بنعبدوا في ايت حتة
--------------------------------------------------------------------------------

عيوشة
محمد الحسن سالم حميد

منبوشة.. نبشوها قبّالك
بت حالا زي حالك
زي كلمة مفقوشة
عودا انبهت حرقان
زي شتلة معطوشة
عينيها رماشة
أم لمبة فتاشة
من طاقا جاتا الريح
كتر البكا التجريح
خلاها دعموشة
تلوشة.. ولاّ ضفاف
خيّم عليها جفاف
زي صرخة الغرقان
فوق موجة بين فيضان
شعراتا منكوشة
شفع مباراها
عيوشة.. عيوشة
الليل هديماتا.. شمش الله برطوشا
تشرب من الشارع.. تاكل من الكوشة
عيوشة.. عيوشة
ترقص لهم رقبة
صقريي جابودي
السمبة كاروشة
عيوشة جامايكا
الهورس عيوشة
سلولي عيوشة
وعيوشة ماب ترقص لكنها الدوشة
تفلت من الشفع
تفلت وتتّرتع
تدخل علي بيتا.. ستاتو منمدي
ناسا بعرفوها .. لكن يعافوها
دايرين غسيل عدي؟
شاكرين يا دقلوشة
يدوها عيشايي
بي دمعة مرشوشة
وتتملك الشارع
خطواتا مربوشة
والسوقة والأطفال
عيوشة.. عيوشا
عيوشة.. عيوشة
الليل هديماتا.. شمش الله برطوشا
تشرب من الشارع.. تاكل من الكوشة
عيوشة.. عيوشة
على قدر ماكاست
عينيك ما لاقت
غير مطبقة وبصلة
المطبقة انهردت.. والبصلة مقروشة
ما قلنا مقشوشة
قشوها قبالك
ديشك ياعيوشة
يا الحاضر الغايب
في الدنيا ما جايب
خبر المديني الكان
على رغم ما فيها
من فاقة من حرمان
مرات اياديها تعطف على الانسان
بي فكة بي قروشا
بي كلمتا طيبي
بي فضلة من مطعم
أو برتكانايتا.. ضرباني في كوشة
والليلي باتت زي.. بيتا في آخر الحي
ناساتو منبوشة
ياجرحنا الهايم
طول النهار حايم
يلبد اذا ما شاف
صحبانو مكشوشة
يضحك اذا الكومر
قبّل على كوبر
ولاّ المديريي
يتمطّق الفرحة
بس فرحة مغشوشة
إن تنجا من كشة
دردير وتلتيلة
كيف تنجا من جوعا
من بردها وليلا
عزّت برنداتا
أوكارا مطروشة
بيت الله قافلنّو
مستشفى غافرنٌو
ساحاتا مرشوشة
كم يوم يعز النوم
رغما عن المشموم
والدوخة والدوشة
دي مدينة ما هيلك
ما في البشبّهلك
مافي البناديلك
لا في البخاويلك
غير ناس أحاويلن
قطعا أحاويلك
أصحابك الساعتك لابد يعاينولك
صمتا يحيولك
باكر تلاقيهن
في وجبة فوق كوشة
جم مجرى يحكولك
ودونا لي ضابط
كالعادة وانكفرن
قال وين أوديهن
والعندي ما قادر
بالموية أكفيهن
والعسكر أدونا سيطان وفكونا
كالعادة ياخويا
حيكومة مربوشة
دايرين شغل.. مافيش
غير نغسل العربات
غير نضرب الاورنيش
عتالة جرسونات
شغلا ميكّل عيش
وبالحالة دي الكشة
بلديي والبوليس
مرات يجيك الديش
ما يقبضو الباعوض
ما يقبضو الضبان
والماب يدور فتيش
الأرزقي السمسار
اشمعنا نحن وليش
نحن الحراميين ولاّ البدسو العيش
الزول يخاف يكفر
يرجع يقول معليش
شقيش نقع شقيش
حتى السجن ما فيش
ما فيش ياعيوشة
حين تكبري آه أواه
وآدم يدور حواه
الطيرة بعشوشة
الفارة باجحاره
الكل بمأواه
وهني في ابن آدم تاه
ملجاهو أرض الله
لا أوضة لا حوشا
يا بونا يا الأسود
يا أمنا القرقد
يا داجي وين ترقد
جاك المحل قاسيت
لا من هجرت البيت
فض المطر فضيت
أم فضضوك غصب
دارك لقيت حرب
كرت عليك فريت
كان ما في غير تنفد
بي لونك الأسود.. بي شعرك القرقد
بي فالك الشامخ
زي تاج أبو الهدهد
لا من يطير في الجو
يختا المدن ينفد
كان ما في غير تشرد
حاشاك من عيب تب
لي شينة ما ختيت
دغري وعراض ايديك
بس كفها اتعود في الأرض يرمي الحب
ما قنبلة ودلميت
جيت المدن لا قيت
من سيدا ما لاقيت
تحرس عماراتو
علشان تمسي تبيت
يتربو زي ما ربيت
كم للعرق شديت
زوغت أمن كريت
جاملت جاراتو
وأول تتم ترحل
لي سيد خلاف السيد
ان غيرو الأتياب
لكنو نفس القيد
نفس الربط ذاتو
يا ماشي دون راس خيت
وين كنت لما الناس
انقسمو الواطا
في مدن تجز الراس
كان زولو ما طاطا
كت ما في ولا أبيت
واصبحت مقطوع راس
زي ديل كتير من ناس
لا أوضة لا ضل بيت
فتحنا لا قيناك وأول ما شالنا الحيل
براحة في ذات ليل
يا أبونا خليناك
خففنا ليك الشيل
تقلت بنا الخرطوم
وفرنا لقمة عيش
موية ومحل للنوم
سامحنا .. عافينا
يا أصلنا الحنان
سامحنا
غيرنا اسامينا
شان نحيا باطمئنان
ديك انقلب عثمان
هاشم بدل دلدوم
ومن وين؟ من ام درمان؟
وناس بيتنا منولفين
بس لكنة الرطان
تفضحنا بعض الحين
وان كنا يوم في يوم
ماشين بنتعود على لهجة الخرطوم
في ولاد عرب بالكوم
طالعين سوا ونازلين
يفرقنا إلا النوم
ما الحالة من بعضا.. مطروش ومطروشة
إكوان قد قابل فوق كوشة عيوشة
يالتحكي دون تبكي
وفي وشو بتعاين
شوف فيهو شن باين
غير دمعة مكشوشة
قشوها ناس اخوان
إكوانو عيوشة
بي صبر كان طول
على حال حيتحول
قصر الزمن يا زول.. ولاّ الزمن طول
لا بدّ ينحول
ما فيهو من آلام
لا بد ينحول
في يوم من الأيام
لي دنيا مفروشة
بالعافي والطعام
لي كل فم ما دام
في غلابة بديوشة
بي جاي وبي غادي
قل وكتر بوشة
تخمج تحت حكام
مندلدلي كروشا
فاوا وتفل لاقّي
نار الغضب باقّي
تالاها محموشة
جرفت لبقة الليل
وانطمبجت د########
لا عينا بشموسا
الحال حيتحول
لابد بيتحول
قصر الزمن يازول .. ولاّ الزمن طول
لا بد من فوقة.. ومن تنتهي الدوشة
قولا قبل قلنا
وكتين نصر نحيا
ما في البكتلنا
قولك ياعيوشة
لا النفس طماعة
غاشاك ومغشوشة
الدنيا دنيانا
زرع ايدنا نديانا
لا صيصة لا كرموشة
وماك ماشي جيت غاشي
ليك خيرا بنسبل
لا كتّي شحادة
لا الديك بتنوكل
لا جيتا دناعة نمسح لك الجردل
أخرت لك ساعة
تلبت في حوشا
في حزك المنجل
وشوالة مخموشة
ناسي إنو مزروبة
بي شوك حبيبينة
وحارساهو كلوبة
وكلوبة ياب ووبة
ويات توبة بتحوشة
يالنفسو ما هيّ
شن جبهة منكبة
بي عمة كاكية
وطاقية طربوشة
جمب جبهة دغرية
العمة ملوية
فوق راسا مكوية
ترقش بياض نية
بالهيبة منقوشة
زي وشم فوق اخوان
شلخا في عيوشة
ياجرحنا الطول
جاييك زمن طيب
خيراتو ليك أول
صدقني ياطيب
يا أرض يا جدول
كادتنو بي معول
والليلي تتجول
عينيك مدهوشة
من كنت تتسول
في مدينة ما هيلك
من كوشة لا كوشة